असोज १७, सोलुखुम्बु । स्वास्थ्यकर्मी माथि दुव्र्यवहार भएको भन्दै ठप्प पारिएको सोलुखुम्बुको जिल्ला अस्पताल फाप्लुको सेवा सुचारु भएको छ । गत सोमबार उपचारमा आएका सोलुदुधकुण्ड नगरपालिका ५ का पेम्बा शेर्पाले चिकित्सक तथा स्वास्थ्यकर्मीहरु माथि दुव्र्यवहार गरेको भन्दै ठप्प पारिएको ओपीडीसहितको स्वास्थ्य सेवा मंगलबार बेलुकाबाट सुचारु भएको हो ।
शेर्पा विरुद्ध जिल्ला प्रहरी कार्यालयमा मुद्धा दायर भएपछि आन्दोलनका कार्यक्रम फिर्ता लिएर नियमित स्वास्थ्य सेवामा फर्किएको अस्पतालका निमित्त प्रमुख डा. प्रशान्त शाहले बताए । डा. शाहका अनुसार सोमवार दिउँसो मदिरा सेवन गरेर उपचारमा आएका शेर्पाले अस्पताल प्रवेश गरेर चिकित्सक तथा स्वास्थ्यकर्मीहरु माथि हातपात गर्दै अस्पतालमा समेत तोडफोडको प्रयास गरेका थिए ।
मदिरा सेवन गरेर सवारी चलाएका कारण दुर्घटनामा परि उपचारका लागि आएका शेर्पा उपचारमा संलग्न स्वास्थ्यकर्मीहरु माथि अपशब्द प्रयोग गर्दै जाइ लागेको अस्पतालले जनाएको छ । त्यसलगत्तै अस्पतालले विज्ञप्ति जारी गर्दै दोषी उपकर कानुनी कारबाहीको माग गरेर आकस्मिक बाहेक अस्पतालको सबै स्वास्थ्य सेवा ठप्प पारेका थिए ।
मंगलबार आरोपित शेर्पा विरुद्ध स्वास्थ्यकर्मी तथा स्वास्थ्य संस्था सुरक्षा ऐन २०६६ पहिलो संसोधन ऐन २०७९ बमोजिम मुद्धा दायर भएपनि आन्दोलनका सबै कार्यक्रम फिर्ता लिएर काममा फर्किएको अस्पतालले जारी गरेको विज्ञप्तिमा उल्लेख छ । आफुहरुको आन्दोलनका कारण सेवाग्राहीमा पर्न गएको असुविधा प्रति अस्पताल प्रशासनले क्षमा याचना गरेको छ ।
शेर्पा हाल जिल्ला प्रहरी कार्यालयको हिरासतमा रहेका छन् । आरोपित शेर्पाले आफु दुर्घटनामा परेर पिडाको आवस्थामा रहेकाले स्वास्थ्यकर्मी माथि आक्रमण गरेको नभई ठुलो स्वरले बोलेको भन्दै माफी मागेका छन् ।
सम्बन्धित समाचार-
