सोलुखुम्बु – प्रहरीले तिब्बती शरणार्थीहरूलाई नेपाली नागरिकता बनाइदिने काममा संलग्न गिरोहलाई पक्राउ परेको छ । प्रहरीले बुधवार काठमाण्डौ उपत्यका अपराध अनुसन्धान कार्यालय मीनभवनमा पत्रकार सम्मेलन गरी यसबारेमा जानकारी गराएको हो ।
काठमाण्डौ उपत्यका अपराध अनुसन्धान कार्यालयको टोलीले झापाका कृष्णबहादुर कटवाल, भक्तपुरका न्युल्केश श्रेष्ठ, मोरङका हिरालाल शिवाकोटी, तनहुँका लोब्साङ ठिन्ले र ललितपुरका विजय लामालाई पक्राउ गरेको हो । उनीहरूले झुट्टा लिखत तथा नक्कली सिफारिस तयार गरी गैरनेपाली व्यक्तिहरूको सक्कलै नेपाली नागरिकता बनाइदिने गरेको पाइएको कार्यालयका प्रहरी उपरीक्षक (एसपी) एवम् प्रवक्ता सोमेन्द्रसिंह राठौरले जानकारी दिए ।
पक्राउ परेकामध्ये कटवाल १० वर्षदेखि लेखापढी व्यवसायमा संलग्न व्यक्ति रहेका प्रहरीले जनाएको छ । पक्राउ परेका नेपाली नागरिक न्युल्केश श्रेष्ठले प्रतिपटक १० हजार रुपैयाँका दरले भाडामा नक्कली बाबु बनेर पाँच जनाको नागरिकताका लागि सनाखत गरेको पाइएको छ ।
गिरोहले तिब्बती शरणार्थीको नागरिकता बनाउन प्रतिव्यक्ति तीनदेखि पाँच लाख रुपैयाँसम्म लिने गरेको पनि अनुसन्धानबाट खुलेको एसपी राठौरले जानकारी दिए । यो गिरोहले गएको ६ वर्षमा पाँच सय जनाभन्दा धेरै तिब्बतीलाई नागरिकता बनाइदिएको प्रहरीको अनुमान छ ।
तिब्बतीलाई नागरिकता बनाइदिएको आशङ्कामा जिल्ला प्रशासन कार्यालय काठमाण्डौमा कार्यरत पूर्व तथा बहालवाला कर्मचारीहरूमाथि समेत अनुसन्धान भइरहेको राठौरले बताए ।
