सोलुखुम्बुमा मकै उत्पादनमा बृद्धि भएको छ । जिल्लामा आर्थिक वर्ष २०७७–७८ मा ३३ हजार ४८ मेट्रिक टन मकै उत्पादन भएकोमा आर्थिक वर्ष २०७८–७९ मा ३३ हजार १८५ मेट्रिकटन मकै उत्पादन भएको हो ।
यि दुई आर्थिक वर्षको तथ्याङ्कलाई तुलना गर्दा १३७ मेट्रिक टनले मकै उत्पादनमा बृद्धि भएको कृषि ज्ञान केन्द्र सोलुखुम्बुले जनाएको छ । पछिल्लो समयमा कृषिमा यान्त्रिकरण, प्राविधिक सल्लाह र बिउ बिजनको सहज उपलब्धताले मकै उत्पादनमा बृद्धि भएको कृषि ज्ञान केन्द्र सोलुखुम्बुका बाली संरक्षण अधिकृत बबि बस्नेतले बताए ।
सिँचाईको उपलब्धता, कृषकमा मकै खेतिबारे प्राविधिक ज्ञान बृद्धि हुनु र प्राङगारिक मल प्रयोगले पनि उत्पादन बृद्धि भएको उनले बताए । जिल्लामा सलह किरा र फौजि किराको प्रकोपका बिच पनि उत्पादनमा बृद्धि भएको कृषि ज्ञान केन्द्रले जनाएको छ ।
जिल्लामा अहिले १३ हजार ७ सय ७० हेक्टर जमिनमा मकै उत्पादन हुने गरेको छ । जसमा २.४१ उत्पादकत्व दर रहेको कृषि ज्ञान केन्द्र सोलुखुम्बुले जनाएको छ । यहाँ गणेश १ र स्थानिय जातको मकै खेति हुने गरेको छ ।
